News Ticker

Maisha, zama na zamu

Nilizaliwa mnyonge Nikakulia unyonge Lakini Nilipambana niishi Niishi waishivyo watu Watu waitwao watu Nami nikajikuta Katika mpambano huo Naingia ulingoni Nikarusha makonde Nami harushiwa pia Kwamba ndivyo maisha yalivyo Maisha zama na zamu

Marehemu Ali Nabwa: "Zanzibar imekufa dungu msooni. Inaambiwa haimo tena mchezoni na ilokula iziteme." (Dira Zanzibar, 2003)

Nakumbuka
Mtaa nalozaliwa
Uliitwa Kisiwandui
Zama hizo zikiitwa
Za usultani
Kwetu tulikuwa masikini
Lakini hatukufa njaa
Senti kumi na tano
Nilizopewa na mama
Kununua maandazi
Na uji wa mbaazi
Zilitosha sana
Mimi naye tukaishi
Maisha zama na zamu

Nakumbuka
Nilioshea harita
Ama sabuni ya chokaa
Lakini
Sikuwa mchafu
Wala sikunuka kikwapa
Kwa kuwa usafi wa nguo
Na uswafihi wa nyoyo
Ilikuwa ni khulka
Ya nyumbani
Zanzibari
Mambo ni zama na zamu

Nyumbani?
Ndiyo nyumbani
Japo kwa maana ndogo
Ya kwamba Mola Jalali
Alinijaalia
Nizaliwe Zanzibari
Na pano pawe ni petu
Wazungu huita home
Bahati mbaya ingawa
Waja watawala waovu
Walitaka kwa yakini
Nife na hali si kwetu
Ati niwe stateless
Hawakuweza
Nilikufa Mzanzibari
Kama nalivyozaliwa
Maisha zama na zamu

Nakumbuka
Kisiwandui yetu
Ya ‘mabondia’ wa mitaani
Akina Msafiri Rocki
Ya Ba Manga na Kaiza
Wekuwa wakipigana
Utadhani wauwana
Hakuna kuamuliza
Ukiingia katikati
Konde mzigo mzima
Vimulimuli machoni
Mbio mtindo mmoja
Maisha zama na zamu

Nakumbuka
Maduka ya mtaani
Kwa Baba Hadi
Majani ya chai pesa mbili
Sukari pesa nne
Mkate wa pesa sita
Kwa Bi Buluu samaki
Kwa Bi Makiya mbaazi
Maisha zama na zamu

Nakumbuka
Kisiwandui kuna misikiti
Mmoja tuliuita Makuti
Mwengine Mabati
Nilisali ndani yake
Nikasujudi kwa Mola
Kwamba nami nalikuwa
Dhaifu mbele ya Bwana
Kama walivyo waja wengine
Wajuao Mungu wao
Maisha zama na zamu

Nawakumbuka
Wanawake wa kikwetu
Walikuwa na heshima
Wakivaa mitandio
Wakijipamba kwa liwa
Kung’arisha ngozi zao
Wakinukia marashi
Na udi wa mawaridi
Nakumbuka kila kitu
Kilichopita maishani
Na hapa sasa nakiri
Maisha zama na zamu

11 Machi, 2007

About Zanzibar Daima (1509 Articles)
Zanzibar Daima, Jana, Leo na Kesho

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s