Dunia

Moyo usighururike, ukavamia dunia
Iache usiishike, mbali nayo bora kuwa
Wala usipaparike, joto la roho kungia
Hino si njema rafiki, hayebu mtu dunia

Waliila waloila, matumboni hayekaa
Bali kupata madhila, ‘kaitema kwa fazaa
Wakabaki lahaula, laitani nengejua
Hiino ndio dunia, ino i tele hadaa

Dunia kiti cha basi, paondokwapo pakawa
Humilikipo nafasi, yako maliyo ikawa
Uzitowo wa unyusi, hugwapo ukasikiwa
Yache dunia ipite, akherayo fikiria

Dunia hii i fyuka, si jambo la kuchezea
‘kiidasa yafyatuka, kitanzini kushangia
Wabaki wapaparika, ‘sijuwe pa kutokea
Shikamanana na yano, ndipo utaongokewa

Dunia haishindika, daima shindi i yoyo
Majabari huanguka, yakaramba zake nyayo
Waponao hupofuka, fimbo ‘kawa dira zao
Tamakani ewe moyo, sighilibike sikia

Dunia i danganyifu, usipotamburikiwa
Utaiona chekefu, ukadhani wachekewa
Tahamaki watilifu, ndani ya domo la chewa
Huno ndo wangu waadhi, ipuze ino dunia

Dunia ina wahaka, wa mja kutotuliya
Kila kukicha wataka, zaidi ya ulopewa
Yakupeleka kupoka, wastahikio pewa
Usifate mwendo uno, takupoteza dunia

Rabi ziongoze nyoyo, zetu siye waja wako
Zipende uyapendayo, zitii amri zako
Zifanye tu yalo ndiyo, yaso siyo yawe mwiko
Na siku ya hukumuyo, tufungiye peponiko.

Hamad Hamad
5 Mei 2011
Copenhagen

About Zanzibar Daima 1700 Articles
Zanzibar Daima, Jana, Leo na Kesho

2 Comments

  1. Umekuwa mtu hadhi, kuuasa wako moyo
    Mfano wako ni ngazi, kwa wengine kuwa nao
    Dunia haina radhi, imekosa kwa Molao
    Thamaniye ni ajizi, muda mdogo ‘lonao
    Kwavyo nami napongeza, Dunia kujiepusha

  2. Gonga hodi wakwambie, dunia ni yetu sote
    Wala haina wenyewe, kwa hilo usiogope
    Wewe umo mie nimo, ili mambo yaongoke
    Dunia ni hii hii, mambo mengi yana tope
    Ukiyaweza si ndwele, ‘kishindwa usitoweke

Leave a Reply