Hunifai

Wanitaka niwe wako, ati wa ubani
Niwe wako mali yako, niwewo mwandani
Siliwezi penzi lako, sebu abadani
Bora kaa peke yako, uwe mbali nami

Ng’ande huna cha kunipa, nikapendezewa
Nakwona watapatapa, wataka ghumiwa
Utakwisha hangaika, hutafanikiwa
Bora kaa pumzika, ‘sijedhihakiwa

Koya huna hata pendo, la kujikusuru
Kunahanikiza vundo, lanuka kufuru
Najibaidisha kando, usijenidhuru
Yamle na ya kidundo, najiweka huru

’Tasemaje wanipenda, na hunipi haki
Hata haki hiiwinda, wajipa hamaki
Kushanigeuza kinda, kesho haifiki
Nenda mwana wa kwenenda, sebu urafiki

Hamad Hamad
19 Mei 2011
Copenhagen

About Zanzibar Daima 1700 Articles
Zanzibar Daima, Jana, Leo na Kesho

Be the first to comment

Leave a Reply

This site uses Akismet to reduce spam. Learn how your comment data is processed.