Shilingi Bilioni 12 zimetumika kutekeleza Miradi ya Maendeleo Z,bar

Imewekwa na Hamed Mazrouy

Jumla ya Shilingi Bilioni 12 zimetumika kutekeleza Miradi ya Maendeleo 820 inayofadhiliwa na Mfuko wa Maendeo ya Jamii TASAF kwa Awamu ya Pili ya Mfuko huo  Unguja na Pemba.

Katibu Mkuu Wizara ya Nchi Ofisi ya Makamo wa Pili wa Rais Khalid Suleiman ameyasema hayo leo katika Warsha ya siku mbili ya kuwajengea uelewa wa Awamu ya Tatu ya TASAF juu ya ‘Mpango wa Taifa wa kunusuru Kaya Maskini’ kwa Wajumbe wa Kamati za uongozi na menejiment za TASAF –Zanzibar huko ukumbi wa Hoteli ya Zanzibar Beach Mazizini.

Amesema katika Miradi hiyo jumala ya Miradi 433 imetekelezwa kwa upande wa Unguja na Pemba imetekelezwa 387 ambapo Wananchi wa Zanzibar kwa ujumla wao waliweza kuchangia Shilingi Bilioni 1.3 za Miradi hiyo.

Aidha amefahamisha kuwa Zanzibar kwa ujumla iilifanya vyema katika kutekeleza Miradi hiyo licha ya changamoto mbalimbali zilizojitekeza kwa kipindi hicho cha Awamu ya pili ya TASAF.

Akifungua Warsha hiyo Makamu wa Pili wa Rais wa Zanzibar Balozi Seif Ali Idd amewataka wasimamizi wa TASAF kuhakikisha kuwa Fedha zinazotolewa kwa ajili ya miradi hiyo zinatumika ipasavyo ili kutimiza maelengo ya Mfuko huo.

Amesema licha ya Zanzibar kufanya vyema katika Awamu ya Pili ya TASAF viongozi hao wanapaswa kuyaendeleza mema yote yaliyofanywa katika Awamu mpya ikiwa ni pamoja na kuziba mianya yote ya ubadhirifu wa pesa za miradi hiyo.

Balozi Seif ameongeza kuwa Serikali ya Mapinduzi ya Zanzibar inaendelea na azma yake ya kuunga mkono utekelezaji wa Mpango huo katika Shehia za Unguja na Pemba ili kuondoa umasikini kwa manufaa ya Jamii na Taifa kwa ujumla.

Amefahamisha kuwa Mpango huo wa Kunusuru Kaya Maskini utaimarisha uwazi, uwajibikaji na kutoa fursa kwa makundi mbalimbali kushiriki kwa kutumia mfumo madhubuti wa kubaini Walengwa katika Shehia.

Balozi Seif amewataka Washiriki wa Semina hiyo kushiriki kikamilifu na kuwa makini ili kufahamu vyema taratibu na miongozo ya utekelezaji wa Awamu hiyo ya Tatu ya Mfuko huo na hatimaye kufanyia kazi kikamilifu.

Awali akitoa Shukrani zake Mkurugenzi Mtendaji wa TASAF Ladislaus Mwamanga ameishukuru Serikali na Wananchi kwa ujumla kutokana na ushirikiano walioutoa katika Awamu zilizopita na kuomba mashirikiano hayo yaendelezwe kwa Awamu ya Tatu.

Aidha Mkuu wa Mkoa wa Kusini Pemba Juma Kassim Tindwa akitoa shukrani kwa niaba ya Washiriki amemuahidi Makamu wa Pili wa Rais Balozi Seif kuwa watatumia uwezo wao wote kuhakikisha Miradi ya maendeleo ya TASAF inasimamiwa vyema na kufikia lengo lililokusudiwa.

Warsha hiyo ya TASAF Awamu ya Tatu inaongozwa na Mkuu wa Mkoa wa Mjini Magharibi Abdallah Mwinyi na kuwashirikisha Wakuu wa Mikoa ya Unguja na Pemba,Wakuu wa Wilaya na Menejiment za TASAF –Zanzibar ambapo mada mbalimbali zitawasilishwa kuwajengea uwezo viongozi hao kuhusu awamu hiyo Mpya.

 

 

IMETOLEWA NA MAELEZO ZANZIBAR  22/01/2013

About Zanzibar Daima 1613 Articles
Zanzibar Daima, Jana, Leo na Kesho

Be the first to comment

Leave a Reply

This site uses Akismet to reduce spam. Learn how your comment data is processed.