Mcheza Kwao

Kucheza tucheze kwetu, kwetu tulikozaliwa
Kunako wazazi wetu, wazazi waheshimiwa
Heshima asili yetu, tuiombe tutapewa

Vijana tucheze shime, hima tutaaminiwa
Tucheze kike kiume, hamna kubaguliwa
Tucheze tusisimame, mchezo hautakuwa

Tucheze tufanye ari, tukijua tutapewa
Tuzipandishe na mori, na kwa nguvu tulizopewa
Wazee wakitukiri, zawadi tutachukuwa

Hili halina ubishi, kwetu tukikuchaguwa
Kwazidisha ushawishi, mchezo tukanogewa
Kwetu michezo haishi, kila tutapoamua

Nasisitiza kwa leo, na maneno kufungiwa
Hajuti mcheza kwao, hata akikosolewa
Anayo mapendeleo, kila mchezo ukiwa

Said O. Shoka
19 Januari 2013
Zanzibar

About Zanzibar Daima 1696 Articles
Zanzibar Daima, Jana, Leo na Kesho

Be the first to comment

Leave a Reply