Ushujaa Kusubiri

Subiri kheri na shari
Subira ni ujabari
Ni woga kutosubiri
Nawe woga ‘siwe nao

Ziche za Mola amri
Siwe mja wa kiburi
Papara ni ufakiri
Nawe ujitenge nao

Nenda yandame safari
Na moyo wenye dhamiri
Utaifika bandari
Pole pole si kwa mbio

Kama waliosubiri
Subira nguvu ya siri
Kwenye vita na kikiri
Ndiyo silaha na ngao

Hutajuta ‘kisubiri
Subira haidhiri
Basi baki na dhamiri
Litatimu kusudio

Mohammed K. Ghassani
Agosti 2000
Zanzibar

About Zanzibar Daima 1696 Articles
Zanzibar Daima, Jana, Leo na Kesho

Be the first to comment

Leave a Reply