News Ticker

ADC watifuana uchaguzi Z’bar

MGOGORO wa kushiriki ama kutoshiriki uchaguzi wa marudio visiwani Zanzibar unatokota ndani ya Chama cha Alliance for Democratic Change (ADC), anaandika Happyness Lidwino.

Said Miraji

Taarifa zilizopatikana ndani ya chama hicho zinaeleza kwamba, kumeibuka makundi mawili makubwa ya viongozi.

Kundi la kwanza linahoji sababu za kukubali kuingia kwenye marudio ya uchaguzi huo uliotangazwa na Mwenyekiti wa Tume ya Uchaguzi Zanzibar (ZEC), Jecha Salim Jecha kufanyika tarehe 20 Machi mwaka huu.

Kundi la pili linaloonekana kubebwa na aliyekuwa mgombea urais wa chama hicho, Hamad Rashid likitaka kushiriki uchaguzi huo bila kujali kufutwa kwa uchaguzi wa awali kulizingatia sheria ama la.

Jecha alifuta uchaguzi huo tarehe 28 Oktoba mwaka jana kwa madai ya kuwepo kwa kasoro, hata hivyo tayari vyama 10 kati ya 14 vimegoma kushiriki uchaguzi huo kwa madai ya kutoona sababu ya kurudiwa.

Hata hivyo, kinachoonekana kuvuruga zaidi chama hicho ni kuwepo kwa taarifa za mmoja wa viongozi wa chama hicho kurubuniwa na Chama Cha Mapinduzi (CCM) ili kushawishi kukubali kuingia kwenye uchaguzi huo kwa ahadi kupewa bahshishi.

Mtandao huu ulimtafuta Said Miraji, Mwenyekiti wa ADC-Taifa kujua ukweli wa taarifa hizo, awali alipopokea simu na kujibu “nipo kwenye kikao, nitafute baada ya saa moja.”

Alipopigiwa kwa mara ya pili akionesha kuwa na haraka, alikiri kuwepo kwa mgogoro ndani ya chama hicho na kwamba, anaandaa taarifa kwa ajili ya kupeleka katika Tume ya Taifa ya Uchaguzi (NEC). Hakusema ni taarifa ipi.

“Niko busy (nimebanwa) sana kwanza chama changu mpaka sasa bado kipo kwenye utata, kwa sasa siwezi kukujibu.

“Na hapa kuna maelezo naandaa, yanatakiwa kupelekwa kwa msajili wa vyama vya siasa sasa hivi, simu yako nimepokea kwa kukuheshimu tu,” amesema Miraji.

Ndani ya chama hicho, Miraji amekuwa akishutumiana vikali na Hamad kwa madai kwamba, anatumika na CCM katika kuhakikisha chama hicho kinashiriki uchaguzi.

Mmoja wa viongozi wa chama hicho aliyetaka jina lake kutoandikwa amesema “viongozi wanatofautiana na kinachoonekana hapa kuna fedha imetumika. Upo ushawishi unaoendelea tena kwa kutumia fedha ili chama kishiriki uchaguzi lakini wanaosema hivyo hawaelezi sababu za kushiriki uchaguzi huo.”

Chanzo hicho kimeeleza kuwa, “wanaosimamia msimamo huo wanashindwa kutoa sababu za msingi ili kuhalalisha hoja yao. Kinachoonekana ni kwamba wengine wana kisasi na CUF hivyo wamekuwa wepesi kutumika, lakini bado tunapambana kugomea uchaguzi. Ngoja tuweke mambo sawa.”

Hamad aliyejiunga na ADC tarehe 23 Julai mwaka jana baada ya kufukuzwa na Chama cha Wananchi (CUF) kwa tuhuma za usaliti, pia amekuwa akihusishwa na ubadhirifu wa fedha ndani ya chama hicho.

Hamad na Miraji wote walikuwa wanachama wa CUF ambapo kila mmoja aliondoka kwa sababu zake na kukutana kwenye chama hicho ambacho inadaiwa kwamba, Hamad alikuwa na mkono wake katika kuanzishwa kwake.

Miraji amekuwa akiongoza harakati za kumng’oa Hamad ndani ya chama hicho kwa madai bila kufanya hivyo, ADC haitakuwa salama.

Mpaka sasa, ushiriki wa vyama vya ADC na Chama Cha Kijamii (CCK) kwenye uchaguzi huo upo njiapanda kutokana na wagombea wake kutangaza kushiriki licha ya vyama vyao kuwa na msimamo tofauti. Vyama ambavyo vimetangaza kushiriki marudio hayo hadi sasa ni CCM, Tadea, TLP, Sau na AFP.

Kwa kipindi cha miezi miwili iliyopita, Zanzibar imeendelea kuwa kwenye mgogoro wa kisiasa baada ya CUF ambayo ni moja ya chama kinachounda Serikali ya Umoja wa Kitaifa (SUK) kususia marudio ya uchaguzi baada ya ule wa awali kufutwa na ZEC.

Chanzo: MwanaHALISI Online

About Zanzibar Daima (1509 Articles)
Zanzibar Daima, Jana, Leo na Kesho

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s